Starfsfólk Frístundar Naustaskóla heilsar ykkur á fremur köldum vordegi. Okkur langaði að senda ykkur kveðju og segja aðeins frá aðstöðunni okkar. Daglega tökum við á móti 60-70 börnum og þá getur nú orðið handagangur í öskjunni! 😊 Þau koma til okkar beint frá sínum kennurum, hengja af sér fötin (1. bekkur) við innganginn í Frístund og taka spjaldið sitt af töflunni. Svo er að velja sér svæði, Sólin, Regnboginn, Skýið, Stjarnan, eða fara út í leik. Aðstaðan okkar í Naustaskóla er góð og nægilegt pláss fyrir alla ef dreifingin er góð. Í Sólinni er hægt að lita og föndra ýmislegt, Regnboginn er ætlaður til meiri „sulluverka“ eins og að mála eða vinna með sand, og fleira slíkt. Þar er einnig stór skjár á vegg og þar horfum við á bíó þegar veðrið er ekki eins og við viljum hafa það. Stundum er poppað meira að segja. Í Stjörnunni er unnið með perlur, þar eru listaverkin framleidd eins og enginn sé morgundagurinn! Við ákváðum um áramótin að í Stjörnunni verði eingöngu rólegheit, við höfum fjöldatakmörk og ef barn kýs að hlýða ekki fyrirmælum þar, þá er því vísað fram. Þessi tilraun hefur gefist vel og þarna er nú athvarf fyrir þá sem kjósa rólegheit og minna áreiti. Í Skýinu höfum við nú fengið 5 Ipad vélar og börnin geta óskað eftir skjátíma þar, 15 mín í senn. Við erum með skemmtilega leiki í þessum vélum og oft mikill spenningur að fá að grípa í.
Á miðvikudögum og fimmtudögum er okkur boðið að fara í íþróttasalinn og það er afar vinsælt. Þar er farið í leiki, fótbolta, handbolta, þrautaleiki og svo mætti lengi telja. Þar er líka gott hátalarakerfi og hægt að setja tónlist á.
Vinna okkar með börnunum ykkar er skemmtileg og fjölbreytt. Við reynum að bjóða upp á handverk og föndur eins og tími gefst, en ýmislegt spilar þar inn í eins og íþróttaiðkanir utan skóla og fleira. Við reynum að gera alla daga góða með virðingu og samvinnu að leiðarljósi.
Við látum myndir af svæðinu okkar fylgja. Eins og sjá má, þá mætti alveg vera meira til í barbie dótinu, húsgögn og fleira svo við þiggjum gjarnan slíkt dót ef það liggur í geymslum og safnar ryki. Við eigum þokkalegt magn af spilum og púslum en værum alveg til í að endurnýja þar ef einhver þarf að losa sig við.
Nú þegar veður fer að skána, vonandi, munum við eyða meiri tíma útivið eða eins og hver og einn óskar. Reynt verður að fara í stuttar gönguferðir og rannsóknarleiðangra og fleira skemmtilegt.
Starfsfólk Frístundar óskar ykkur gleðilegs sumars og þakkar fyrir samstarfið í vetur.
Erna Sigmundsdóttir,
forstöðukona Frístundar Naustaskóla.
