Fréttabréf Flóaskóla
janúar 2024
Kæra skólasamfélag
Um áramót er við hæfi að líta yfir farinn veg og horfa síðan til framtíðar. Haustönnin í Flóaskóla var afar viðburðarrík, mörg ólík og misstór viðfangsefni sem nemendur tókust á við undir handleiðslu starfsmanna. Má þar nefna heimsmarkmiðaþema, heimsókn samstarfsskóla frá Danmörku, leiksýningu elsta stigs og jólasýningu 1.-6. bekkja, smíði langspila og leik á þau, skólaþing, dans og íþróttaviðburði auk hefðbundnara náms. Það sem einkenndi starfið á haustönn var samkennd, gleði og virðing sem eru sannarlega gildi sem við getum verið stolt af að skíni í gegn í öllu okkar starfi.
Á vorönn bíða okkar svo ótal áhugaverð og lærdómsrík verkefni sem við kynnum til leiks smám saman.
Starfið í skólanum á nýju ári hefst með viðamiklu þemaverkefni sem við nefnum Óskaveröldin mín, þar er byggt á hugmyndafræði Uppeldi til ábyrgðar. Við skoðum þarfir okkar, gildi og samskipti. Verkefninu er ætlað að gera nemendur meðvitaðri um eigin langanir og væntingar og hvað það er sem skiptir okkur máli og gerir okkur hamingjusöm. Afrakstur verkefnisins kynna börnin ykkar svo fyrir ykkur í nemenda- og foreldraviðtölunum í febrúar. Í þeim viðtölum ætlum við að flétta saman hefðbundnum viðtölum og svokölluðum nemendastýrðum viðtölum, þar sem nemendur undirbúa hluta viðtalsins og stýra því. Okkur finnst það áhugaverð nálgun og til þess fallin að valdefla nemendur í náminu sínu. Nemendur á yngsta stigi kynna eitt verkefni, en á eldri stigum taka nemendur þátt í undirbúningi og framsetningu allra þátta viðtalsins auk þess sem þeir velja verkefni sem unnið hefur verið á skólaárinu sem þeir eru stoltir af að sýna ykkur. Það verður spennandi að sjá hvernig spilast úr þessu hjá okkur og hver ykkur líkar þessi framsetning viðtala.
Við horfum til komandi árs með tilhlökkun, megi árið 2024 vera okkur öllum til gæfu og gleði.
Bestu kveðjur úr Flóaskóla
Þórunn Jónasdóttir
Gjaldskrár og verðlagshækkanir í Flóahreppi - bókun sveitarstjórnar Flóahrepps
"Fyrir liggur minnisblað frá sveitarstjóra er varðar umræðu um gjaldskrár- og verðlagshækkanir vegna umræðu og ákalls til sveitarfélaga í landinu um endurskoðun á gjaldskrám.
Sveitarstjórn styður umræðu um þjóðarsátt með það að markmiði að ná verðbólgu og vöxtum í landinu niður. Sveitarstjórn telur mikilvægt að þjóðarsátt náist vegna nýrra kjarasamninga og að á sama tíma axli hið opinbera ábyrgð með hófstilltum gjaldskrárhækkunum. Í nýsamþykktri fjárhagsáætlun Flóahrepps eru hófstilltar hækkanir á gjaldskrám og sumar gjaldskrár tóku engum breytingum á milli ára. Samþykktar gjaldskrár vegna skólamáltíða, lengdrar viðveru, fæðisgjalda í leikskóla og leikskólagjalda ættu að taka hækkun skv. vísitölu neysluverðs 1. febrúar og 1. ágúst árlega.
Sveitarstjórn samþykkir að gjaldskrár vegna skólamáltíða, lengdrar viðveru, fæðisgjalda í leikskóla og vegna leikskólagjalda taki ekki hækkunum skv. vísitölu neysluverðs þann 1. febrúar 2024.
Samþykkt með 5 atkvæðum.“
Þeagr hringt er í Flóaskóla
Við í skólanum höfum verið að leggja áherslu á að alltaf sé hægt að ná í okkur, að símanum sé alltaf svarað frá 7:45-15:30. Til að auka líkur á því erum við með símana stillta þannig að fyrst hringir á skrifstofunni, þrjár hringingar. Ef ekki er svarað flyst símtalið yfir á skrifstofu skólastjóra, þar hringir þrisvar sinnum og flyst loks í farsíma skólastjóra. Nokkuð hefur borið á því þegar fólk er að hringja í skólann að loks þegar hringir í farsímanum þá er fólki farið að lengja eftir svörun og búið að leggja á áður en næst að svara. Ekki er möguleiki að hringja til baka því símnúmerabirtingin er Flóaskólanúmerið vegna þessra símflutninga. Við viljum því benda á þetta og ef erindið er brýnt að láta þá hringja áfram.
En svo er auðvitað líka alltaf hægt að hringja í farsímanúmerið beint en það er 7718342.
Nemendur á miðstigi spiluðu saman félagsvist i vikunni. Þetta gekk afar vel og gaman að viðhalda því að börn kunni að spila þetta skemmtilega spil, sem eflir í senn félagslegan þroska og rökhugsun.