Fréttabréf Flóaskóla
febrúar 2024
Kæra skólasamfélag
Líf og starf í skólanum er með nokkuð hefðbundnu sniði, en vetur konungur hefur þó aðeins truflað skipulagið hjá okkur þannig að við höfum þurft að fresta skólabyrjun, fara fyrr heim einhverja daga og fella niður skólastarf. En við látum það ekki á okkur fá og reynum að dansa í takt við veðrið, þó það geti stundum reynst ófyrirsjáanlegt, stundum betra en spár gera ráð fyrir og stundum verra. Markmið okkar er alltaf að setja öryggi nemenda í skólabílunum í fyrsta sætið og að allir komist heilir heim.
7. febrúar fáum við góða heimsókn frá List fyrir alla þegar leikarar úr Leikhópnum Lottu koma með leikritið Pínulitla Mjallhvít og sýna yngsta stigi skólans og elstu deild leikskólans. Um er að ræða skemmtilegt atriði unnið uppúr Mjallhvíti sem Leikhópurinn Lotta sýndi árið 2015. Þetta er um hálftíma atriði prýtt fallegum boðskap, léttleika og söng. Sýningin verður í Þjórsárveri kl 8:30.
Nokkur hópur nemenda ásamt Eyjólfi Eyjólfssyni vinnur nú af kappi að undirbúningi langspilsverkefnisins með Sinfóníuhljómsveit Íslands og Listasafni Íslands. Allir nemendur í 5.-10. bekk áttu þess kost að taka þátt í verkefninu, ríflega 20 nemendur eru í langspilssveitinni. Dagana 12.-14. febrúar verður fyrri lota þessa samstarfs í Hörpu. Tónleikarnir nefnast Fljúgðu, fljúgðu klæði. Lokaafurð verkefnisins eru skólatónleikar Sinfóníuhljómsveitarinnar með þátttöku nemenda í Langsspilssveit Flóaskóla. Hljómsveitarstjóri er staðarhljómsveitarstjóri Sinfóníuhljómsveitarinnar Ross Jamie Collins og kynnir og sögumaður er Ólafur Egill Ólafsson, leikari, handritshöfundur og leikstjóri.
Öskudagurinn 14.2. verður haldinn hátíðlegur líkt og undanfarin ár, óhefðbundin dagskrá er í skólanum þann dag, kötturinn sleginn úr tunnunni og annað öskudagsfjör í boði. Hádegismatur verður í fyrra fallinu og skóla lýkur kl 12:00.
Daginn eftir er starfsdagur í skólanum og engin kennsla, en frístundin er opin frá 8:00-16:00.
Föstudaginn 16.2. eru svo nemenda- og foreldraviðtöl, þar sem nemendur kynna foreldrum sínum verkefni úr þemavinnunni Óskaveröldin mín sem hefur verið helsta viðfangsefni nemenda síðan 20. janúar. Opnað verður fyrir skráningu í viðtöl mánudaginn 5.2. Í einhverjum tilvikum bjóða kennarar upp á viðtöl eftir kennslu vikuna 12.-15.2. Frístund er líka opin þennan dag frá 8:00-16:00. Mikilvægt er að skrá börnin í frístundina þessa daga svo hægt sé að skipuleggja mönnun og matarundirbúning í samræmi við fjölda barna.
Mánudag 19. og þriðjudag 20. er svo vetrarleyfi í skólanum.
Að afloknu vetrarleyfi hefja nemendur á yngsta stigi undirbúning að leiksýningu. Emil í Kattholti varð fyrir valinu að þessu sinni og gaman verður að sjá afrakstur þeirrar vinnu í mars.
Bestu kveðjur úr Flóaskóla
Þórunn Jónasdóttir
5.2. opnar fyrir skráningu í Mentor fyrir viðtölin 16.2.
Breyting á aðkomu umferðar að Flóaskóla, ekið að skólanum við Þjórsárver
Eins og kom fram í fréttabréfi skólans í desember á að takmarka aðgengi að innkeyrslu við Flóaskóla og beina allri umferð annarri en skólabíla á planið við Þjórsárver. Búið er að útbúa skilti sem verður sett upp niðri við afleggjarann á allra næstu dögum. Þar kemur fram að innakstur er bannaður öllum ökutækjum öðrum en skólabílum, á virkum dögum frá 7:45-15:45. Þegar skiltið er komið upp leggja allir starfsmenn á planinu við Þjórsárver og foreldrar sem keyra börn sín í eða úr skóla koma líka á það plan. Undantekning frá þessu er að aðgengi fyrir fatlaða verður við inngang skólans. Við gerum okkur grein fyrir að þetta er breyting sem getur verið óhentug fyrir þá sem koma að skólanum, en þetta er gert til að auka öryggi nemenda og það hlýtur alltaf að vega þyngst í ákvörðunum okkar. Með von um góða samvinnu í þessu umferðaröryggisverkefni.
Skólakór Flóaskóla og samsöngur einu sinni í mánuði
Á nýju ári fórum við af stað með kórstarf í skólanum og stýrir Hafdís Gígja starfinu. Tvær æfingar eru á viku, 1.-4. bekkur æfa á fimmtudögum kl 13:30-14:00 og 5.-7. bekkur æfir á sama tíma á miðvikudögum. Þátttaka í starfinu er valkvæð. Fyrstu vikur ársins nýttum við til að leyfa öllum áhugasömum að taka þátt í æfingum til að prufa og ákveða sig. En þátttaka eftir það er svo bindandi til vors svo hægt sé að byggja upp starfið. Verkefnið fer vel af stað og áhugi nemenda er jafnvel meiri en við bjuggumst við, svo kemur auðvitað í ljós að fjársjóður fallegra söngradda leynast í nemendahópnum.
Hugmyndir um samsöng hafa líka verið á kreiki og er ætlunin að hafa samsöng einu sinni í mánuði, á miðvikudögum kl 13:10-13:30. Þá söfnumst við saman í og við stigann og syngjum saman nokkur lög sem allir kunna, stefnt er að fyrstu samveru miðvikudaginn 7.febrúar.
10. bekkur í Nordplus- og útskriftarferð til Danmerkur
Nemendur í 10. bekk fara til Danmerkur í apríl. Það er að stærstum hluta tengt Nordplus verkefni okkar með Gudenoskolen en síðan er tveimur dögum bætt við ferðina sem útskriftarferð árgangsins. Föstudaginn 23. febrúar kl 18:00-20:00 verða nemendur með fjáröflunarsamkomu í Þjórsárveri. Þar verður spilað bingó, dregið í happdrætti og settur upp kökubasar. Í febrúar verður einnig farið í flöskusöfnun í hreppnum.
Niðurstöður vinnu varðandi notkun nemenda á símum á skólatíma í Flóaskóla
Unnið var út frá þeirri niðurstöðu að allir þrír hóparnir völdu að Notkun háð samþykki starfsmanna væri góður kostur, þó foreldrakönnunin sýni reyndar vilja mjög margra foreldra til að banna síma alfarið.
Á skólaþinginu var unnið með fjórar spurningar:
1. Hverjir eru kostir og gallar þess að vera með símann í skólanum?
2. Ef kennslustundir og matsalur yrðu símalaus svæði - hvernig ættum við að gera það?
3. Ef símanotkun yrði takmörkuð (leyfð með reglum) t.d. í frímínútum og skólabílum, hvaða reglur ættu að gilda þar?
4. Hvað eigum við að gera ef ekki er farið eftir þeim reglum sem settar eru?
Skólaráð hittist síðan á nýju ári og setti saman reglur út frá þeim niðurstöðum sem komu fram bæði í könnununum og á skólaþinginu. Þær má sjá hér fyrir neðan. Í nemenda- og foreldraviðtölum um miðjan febrúar verður óskað eftir undirskrift foreldra og nemenda um að allir séu upplýstir um hverjar reglurnar séu og samþykkir því hvernig unnið verður með þessar símatakmarkanir. Reglurnar taka svo gildi að afloknu vetrarleyfi 21. febrúar. Í tengslum við þessar breytingar er verið að auka afþreyingu fyrir nemendur í frímínútum, búið er að setja fram borðtennisborð í Þjórsárveri og einnig er hægt að fara í pílukast. Svo eru í pöntun fótboltaspil og billjardborð sem vonandi verða komin upp eftir vetrarleyfið.
Reglur um símanotkun nemenda í Flóaskóla á skólatíma
- Nemandi setur síma sinn í símabox í upphafi skóladags og fær svo símann afhentan aftur í lok skóladags. Boxið er geymt í lokaðri hirslu á skólatíma.
- Sími er notaður þegar starfsmaður ákveður að eigi að nota hann í ákveðnum tilgangi og þá er það á ábyrgð viðkomandi starfsmanns að síminn fari aftur í boxið.
- Notkun síma er heimil í skólabíl fyrir skólabyrjun og í lok dags en gæta þarf þess að notkunin valdi ekki truflun fyrir aðra farþega bílsins.
Með undirskrift sinni lýsa nemandi og foreldri/forráðmaður því yfir að þau séu meðvituð um reglurnar og að nemandi fari eftir þeim. Ef upp koma vandamál varðandi símanotkun nemanda er haft samband við foreldri/forráðamann og fundin lausn.
Reglurnar eru unnar upp úr könnun nemenda í 4.-10. bekk,
foreldra/forráðamanna allra nemenda og starfsmanna
og niðurstöðum skólaþings með sömu aðilum,
nóv-des 2023