Árshátíð Djúpavogsskóla er risastórt samvinnu verkefni með Cittaslow tengingar í allar áttir.
Á þessum vikum setjum við mikla áherslu á að efla lykilhæfni nemenda.
Í aðalnámskrá grunnskóla segir:
Menntagildi lykilhæfni felst meðal annars í því að þroska sjálfsvitund og samskiptahæfni nemenda og búa þá undir virka þátttöku í lýðræðissamfélagi og getu til að nýta sér styrkleika sína til áframhaldandi náms og starfsþróunar þegar þar að kemur.
Hæfni til tjáningar, gagnrýninnar hugsunar, hæfni til samstarfs við aðra, sjálfsþekkingar, ábyrgðar og sjálfstæðis, frumkvæðis og skapandi hugsunar eru meðal þeirra þátta sem leggja grunn að heildstæðri almennri menntun alla ævi.
Í árshátíðar undirbúningi þurfa allir, bæði nemendur og starfsfólk, að finna hugrekkið sitt og stíga út fyrir þæginda rammann sinn. Við þurfum að bera virðingu fyrir hvert öðru og við þurfum að vera tilbúin að vinna öll saman.
Það er alltaf jafn góð tilfinning að finna hvað samfélagið okkar er tilbúið til að taka þátt í þessu verkefni með okkur og það er komin svo sterk hefð fyrir þessu samfélags verkefni að sumir vinnustaðir gera ráð fyrir því að taka frá ýmiskonar efni í árshátíðar vinnu.
Sem dæmi þá eru nokkrar vikur síðan starfsfólk Við Voginn fór að taka til hliðar ýmislegt sem tengist kaffihúsamenningu og nýtist í sviðsmynd. Strax á mánudaginn kom starfsmaður frá Búlandstindi færandi hendi og gaf okkur tröllakassa í sviðsmynd. Hótel Framtíð er búin að setja upp svið og gera ráð fyrir því að við höfum aðgengi að því. Magnús Kristjánsson lánar okkur tækjabúnaðinn sinn og í ár ætlar Dagur Björnsson og William Óðinn að vera með nemendum á sýningardegi og stýra ljósum og hljóði.
Neisti lánaði okkur karaoke græjuna sem þeir eiga og það er alveg frábært fyrir nemendur að æfa lögin með þessum hætti.
Foreldrar taka alltaf þátt í árshátíðar vinnu og sem dæmi þá man ég ekki eftir sýningardegi án þess að Auja á Hvannabrekku hafi séð um hárgreiðslu og förðun og Birgir Thorberg um ljós og hljóð og margir aðrir sem taka þátt með ýmsum hætti. Foreldrafélagið styður vel við okkur m.a. með því að útvega okkur ýmislegt í gegnum Notó.
Öll þessi hjálp er ómetanleg og ég hvet alla foreldra sem áhuga hafa á að taka þátt í þessu verkefni með okkur að heyra í okkur, eða bara að kíkja í heimsókn í næstu viku milli 10:00 og 12:30 og sjá hvað er að gerast :)
