Það er búið að vera mikið fjör hjá okkur í þessari viku. Við náðum að halda okkar fyrsta skólaþing, sem lukkaðist mjög vel. Það var fín mæting, þótt að við hefðum auðvitað viljað sjá alla.
Það var unnið vel í hópum og það komu margar góðar hugmyndir. Við lærðum ýmislegt, kannski þurfum við að skipta skólaþinginu næst, það gekk vel að hafa alla hópa saman. Það var frábær stemming hjá þeim yngstu og áberandi að sjá hvað þeirra hugmyndir snúa að því að allir séu vinir.
Á mið- og unglingastig bættust svo flottar hugmyndir við, þær snéru mikið að símanotkun, hvernig hægt er að bæta skipulag og fleira.
Við sáum líka að það var frábær hugmynd að setja elstu nemendur í það hlutverk að stýra umræðum í hópunum. Þau leystu þetta verkefni mjög vel og reyndar svo vel að fólk hefur sent skólastjóra skilboð og vilja skila hrósi til þeirra. Það var dásamlegt að sjá elstu nemendur leiða þá yngstu í rétta hópa og hjálpa þeim að koma þeirra hugmyndum á blað.
Rauði þráðurinn eftir þessa vinnu er klárlega að við þurfum að endurskoða skólareglurnar.
Eitt af því sem við sáum er að það er mjög mikilvægt að foreldrar komi með nemendum, það myndast svo mikilvægt samtal þegar við ræðum þetta saman í þríhyrningnum (nemendur, foreldrar og skóli). Kannski þurfum við að breyta tímasetningu fyrir næsta ár, eða bjóða upp á tvær tímasetningar, allt þetta ætlum við að skoða saman og finna góða leið.
Ég mun fara yfir niðustöður skólaþingsins með nemendaráði og í framhaldi kynna þær í svona fréttabréfi.
Að skipulagi skólaþingsins komu margir. Bylgja Borgþórsdóttir íþrótta- og æskulýðsstjóri Múlaþings útbjó grunn-skipulag með gildin okkar sem leiðarljós.
Tinna Halldórsdóttir yfirverkefnastjóri hjá Austurbrú útfærði grunnskipulagið að Djúpavogsskóla. Tinna var komin til okkar um hádegi á miðvikudaginn og undirbjó umræðustjórana og leiðbeindi okkur hvernig við ættum að stilla upp fyrir þingi.
Alfreð hristi okkur saman með góðu hópefli og Ágústa var með flott erindi um mikilvægi öflugar liðsheildar. Ágústa stóð líka vaktina fyrir hönd foreldrafélagsins og sá til þess að við fengum hollan og góðan kvöldmat.
Takk kærlega fyrir ykkar frábæra framlag.
Starfsfólk skólans sýndi svo sannalega að við erum öflug liðsheild. Um leið og kennslu lauk var raðað upp í stofurnar, allt efni ljósritað og sett á rétta staði. Starfsfólk fór svo á milli hópa og tók þátt í umræðum og þegar þinginu lauk hjálpuðust allir að við frágang.
Vel gert hjá okkur.
Þórdís Sævarsdóttir, nýr aðstoðarskólastjóri var með okkur á skólaþinginu og byrjaði á því að sameina okkur í söng, mjög skemmtilegt, velkomin til starfa Þórdís.
