Kæru foreldrar/forsjáraðilar.
Vikurnar fljúg hreinlega áfram og áður en við vitum af verður komið vor. Það hafa verið mikil forföll á bæði nemendum og starfsmönnum þessar vikur sem af eru ársins. Bæði vegna fjarveru fólks og samkomutakmarkanna var ákveðið að fresta árshátíð nemenda sem vera átti í febrúar en búið er að setja hana á dagana 31. mars og 1. apríl. Tveggja daga vetrarfrí er í næstu viku auk starfsdags en í framhaldi af því verður farið á fullt að undirbúa árshátíðina.
Í byrjun mars koma tveir kennarar úr fæðingarorlofi þær María Björk og Jana Hrönn. Jana mun fara inn í 3. bekk og vera með Óskari auk þess að taka að sér einhver önnur verkefni. María Björk kemur inn í 7. bekk og verður með Stefáni en kemur einnig að öðrum árgöngum.
Við leggjum áfram mikla áherslu á lestur og þökkum fyrir gott samstarf. Eftir síðustu niðurstöður lesfimiprófanna erum við yfir landsmeðaltali í 5 árgöngum en aðeins undir í tveimur. Við tökum niðurstöðurnar alvarlega og erum að skoða hvað við gerum í þessum tveimur árgöngum. Við hvetjum ykkur til að sinna heimalestri sem er nú eina heimanámið í Engidalsskóla. En samkvæmt Lestrarstefnu Hafnarfjarðar eiga allir nemendur að lesa í það minnsta 15 mínútur á dag. Víða er að finna góðar hugmyndir að því hvernig hægt er að hafa lestrarþjálfunina fjölbreytta og höfum við verið að deila síðum í fréttabréfunum en það má líka vera í sambandi við skólann og fá ráð.
Við stefnum á að fara með miðstigið í skíðaferð í Bláfjöll einhvern dag í mars. Ekki er búið að dagsetja ferðina en það verður gert með hliðsjón af veðurspá. Við gerum okkur grein fyrir því að ekki eiga allir búnað en við höfum fengið tilboð frá skíðaleigunni. Það verður líka í boði að fara með sleða og snjóþotur og leika í snjónum. Ef einhverjir nemendur vilja alls ekki fara munum við leysa það mál og þau verða í skólanum í öðrum verkefnum.
Með bestu kveðju stjórnendur Engidalsskóla.
