Fréttabréf Flóaskóla
apríl 2024
Kæra skólasamfélag
Í mars voru það nemendur á yngsta stigi sem áttu sviðið í bókstaflegri merkingu. Hinn síungi Emil í Kattholti var settur á svið og sýndur fyrir fullu húsi þann 20. mars. Nemendur í 1. - 4. bekk léku og sungu. Mörg lög úr þessu skemmtilega verki voru flutt af stakri prýði og aðdáunarvert var að heyra hversu vel nemendur kunnu þessa löngu og flóknu texta. Leikverkinu skiluðu þau líka með miklum sóma og þónokkrir efnilegir leikarar sáust í hópnum. Það er ómetanlegur lærdómur sem felst í svona uppsetningu og þó að sé mikil vinna kringum þetta þá skilar það sér margfalt.
Ferðir eldri nemenda gengu mjög vel, bæði skíðaferðin á Sauðárkrók og ferðin í skólabúðirnar að Reykjum í Hrútafirði. Nemendur voru þar sjálfum sér og skólanum til sóma í hvívetna.
Haldið var upp á alþjóðlegan Dag stærðfræðinnar fimmtudaginn 14. mars. Dagsetningin tengist tölunni pí (3,14). Hvert ár er gefið út þema dagsins og var það að þessu sinni, leikið með stærðfræði. Í Flóaskóla var ákveðið að vinna með ýmiskonar þrautir og var ein þeirra að finna út hversu margar poppbaunir væru í stórri plastkrukku og hver væri besta leiðin til að finna það út. Allflestir tóku þátt í þessari þraut, sumir giskuðu á fjöldan en aðrir beittu fjölbreyttum leiðum útreikningum. Það var gaman að fylgjast með nemendum í þessu verkefni og nokkrir komust ansi nærri réttri niðurstöðu.
Nemendur eru enn á farandsfæti. Strax að afloknum páskum fóru 10. bekkingar í ríflega vikulanga ferð til Danmerkur. Fyrst hittu þau samstarfsfélaga sína úr Nordplus verkefninu, nemendur í Gudenoskulen. Eftir um vikudvöl með þeim ætla þau að ljúka Danmerkurdvölinni með útskriftarferð í Kaupmannahöfn og koma svo heim fimmtudag 11.4.
Miðstig skólans er önnum kafið við uppsetningu sinnar leiksýningar og verður það leikrit sýnt í Þjórsárveri 22. apríl kl 17:00. Leikritið er í anda Lion King, ævintýraþema með gamansömu sveitaívafi.
Lögð verður sérstök áhersla á lestur í apríl, 4. bekkingar æfa fyrir Litlu upplestrarkeppnina sem haldin verður í lok mánaðar og 7. bekkur undirbýr sig fyrir Stóru upplestrarkeppnina. Hún fer fyrst fram innan skólans en svo fara fulltrúar skólans og keppa við nemendur 7. bekkja í skólunum í Uppsveitum Árnessýslu seinnihluta maí.
Upp úr miðjum maí er ætlunin að vera með fjölskyldudag í skólanum og verður undirbúningur fyrir hann eitt af verkefnum aprílmánaðar. Þann dag geta nemendur, starfsfólk og foreldrar komið á hestum í skólann, búið er að útvega girðingu fyrir hrossin þar til skóladegi lýkur. Við komum til með að heyra í ykkur foreldrum / forráðamönnum þegar nær dregur með hverjir hyggjast koma ríðandi í skólann og frá hvaða stöðum verður lagt upp að morgni. Nánari upplýsingar um fyrirkomulag og dagskrá verður kynnt í maí-fréttunum. En dagurinn verður helgaður hreyfingu og útivist.
Viðburðarríkir dagar framundan og svo er sumardagurinn fyrsti rétt handan við hornið
Bestu kveðjur úr Flóaskóla
Þórunn
Upphaf skóladags skólaárið 2024-2025
Við skipulagningu komandi skólaárs langar okkur að skoða hvort hægt sé að seinka skólabyrjun um 10 mínútur, þannig að skólinn byrji klukkan 8:20. Lok skóladags myndu ekki breytast, skóla myndi ljúka kl 14:00 hjá öllum nemendum. Ef við göngum út frá að skólaakstursleiðir verði svipaðar og í vetur þá seinkar þetta komu bílanna á flesta staði um 10 mínútur. Þar sem við vitum ekki hvort þetta hefur þau jákvæð eða neikvæð áhrif á skipulag heimila að morgni þá ætlum við að kanna stöðuna á því áður en við tökum endanlega ákvörðun. Til að fá sem skýrust svör þá kemur ritari skólans til með að hringja á hvert heimili í næstu viku og kanna hvort þessi breyting væri til bóta, skipti engu máli eða hvort hún gæti skapað einhvern vanda.
Skólahreysti 2024
Nú er komið að skólahreystinni. Flóaskóli er í 5. riðli og keppir fimmtudaginn 18. apríl kl 17:00 í beinni útsendingu í sjónvarpinu (RUV). Við hvetjum alla til að horfa á þessa frábæru fulltrúa skólans og senda þeim öfluga stuðningsstrauma.
Eins og þið vitið eflaust flest þá hefur skólahreystiliðið okkar staðið sig sérstaklega vel síðustu ár, hér á myndinni er keppnisliðið frá í fyrra.
En stuðningslið er líka mjög mikilvægt í svona keppni. Því fer rúta frá Flóaskóla kl 15:15 og býðst nemendum í 7.-10. bekk að fá far með henni í Laugardalshöllina. Það þarf að skrá sig og fargjaldið er 2000 kr. Tveir kennarar fara með rútunni. Stuðningsliðið verður með upphitun í Þjórsárveri frá kl 14:00, allir fá smá hressingu áður en lagt er af stað í bæinn.